شرح شامل وسهل للتجارة الإلكترونية_E-Commerce Local

 

شرح شامل وسهل للتجارة الإلكترونية_E-Commerce Local 

فهاد الموضوع غادي نوضح فيه كل ما يتعلق بالتجارة الإلكترونية بالنسبة لي ناوي يبدا فهاد الضومين، وكذلك غادي نهضر فيه شويا

على التسويق الإلكتروني بالنسبة للناس لي عندهم ديجا مشاريع او منتوجات وباغين يسوقوها ... وطبعا غادي نهضر على هادشي بلا زواق بلا كلمات مخلطة بالإنجليزية و الفرنسية باش نوضر بنادم ونبان زعما خاتر في الضومين ... غادي نعطي دكشي بالشرح الممل وبلغة "الخبز وأتاي".

◾️مفهوم التجارة الإلكترونية :

التجارة الإلكترونية او الإكوميرس كيفما غادي تكون سمعتي عليها هي البيع والشراء عبر الإنترنت ... يعني في بلاصت ما يكون عندك محل او كاري حانوت كتبيع فيه شي منتجات، غادي تبيعها نتا غير في الانترنيت ومن الدار او المكتب ديالك، وماشي ضروري يجي بنادم يشوف السلعة ويديها بيدو، هو كيشوف السلعة لي حاطها نتا في الموقع ديالك على الإنترنت او صفحتك على مواقع التواصل وكيتواصل معاك، سواء عبر خدمة الشراء في الموقع او الواتساب او التيلفون وكتفاهموا ونتا كترسلها ليه عبر خدمات التوصيل ... صاااافي هاذي هي التجارة الإلكترونية بكل بساطة.
دبا غادي يكونوا عندك بعض الأسئلة وبعض المفاهيم لي ما عارفهاش، وغادي تجيك هضرتي مختزلة بزاف ... علاش؟ حيت بقيتي كتابع شي وحدين لي دايرين فيها خبراء وكيبقاو على بنادم بالعربية لي مخلطة بالفرنسية والإنجليزية وديك الهضرة الخاوية لي هوما براسهم حافظينها من اليوتيوب.

◾️أسئلة شائعة حول التجارة الإلكترونية :

- أشنو هي الإكوميرس لوكال : هو تبيع منتجات عبر الإنترنت في دولتك او مدينتك.

- اشنو غادي نحتاج باش نبدا فيها : غادي يخصك بيسي او تيلفون وغادي يخصك حساب بنكي وغادي يخصك تكون تعرف لفيسبوك أدس، يعني دير حملات إعلانية في الفيسبوك (تعلم ليه في اليوتيوب) وراس المال طبعا لي ممكن يبدا من 500 درهم لفوق ...

- واش ضروري خاص يكون عندي موقع إلكتروني : طبعا لا، في الأول غادي تبدا غير بصفحة فيسبوك غادي تحط فيها السلعة ديالك ودير ليها الإعلان وتبدا تهضر مع الناس وتبيع وتشري ... حتى تبان ليك القضية فيها ما يدار وتزاد الخير وكثر عليك دكشي عاد دير موقع إلكتروني ديالك.

- اشنو هوما الخطوات باش نبدا ؟
☆أولاً : غادي دخل لليوتيوب وتكتب (فيسبوك أدس) غادي يطلعو ليك بزاف ديال الفيديوهات شوف شي واحد لي يدخل ليك الخاطر وتبع معاه حتى تعلم الشادة والفادة و على الإعلان في الفيس، علاش؟ باش ملي تبغي تبيع شي منتج غادي يخصك دير ليه الإعلان باش يوصل لأكثر عدد ديال الناس لي مهتمين بالمنتج لي كتبيع ...

☆ثانياً : غادي تفتح حساب في بنك باش تبقى تخلص فيسبوك أدس ودير الحملات الإعلانية ديالك وتحط فيه فلوسك لي غادي يصيفطو ليك الناس لي غادي يشريو من عندك ...

☆ثالثاً : غادي تفتح صفحة في الفيسبوك ودير ليها إسم خاص وهو لي غادي يكون العلامة التجارية ديالك فحال الإسم ديال المحل ... ودير ليها لوغو و دكشي يكون مستيكي ...

☆رابعا : غادي تمشي تبحث على المنتجات لي تقدر تمشى ليك، هادي نتا وشطارتك ما نقدرش نقوليك اشنو تبيع، ختار نتا وخدم دماغك، غادي دير ليه تصيورات ناضين اولا فيديو زوين وتكتب فقرة قصيرة تشرح فيها المنتوج وتحط فيها وسائل الاتصال فحال التيلفون والواتساب وهاذ الفقرة هي باش تجر لكليان وهي لي كتحط مع الصورة في الصفحة ودير ليه الإعلان ...

☆خامسا : دبا نتا راك كدير الايكوميرس .. صافي غادي تقابل دكشي وملي يشري من عندك شي واحد المنتوج راك كتصيفطو ليه سواء عبر أمانة او شركة توصيل او ليفرور او تقدر تليفري بوحدك الى كان في مدينتك باش تنقص عليك المصاريف ...

● هاد المعطيات لي عطيت الفوق حاولت ما امكن نبسطها ونختصر، واخا كل نقطة من هادشي راه بحر، ولكن غادي تعرف كلشي وتزيد تعلم ملي غادي تبدا في الحرفة وما تنساش راه كين اليوتيوب لي تعلمنا منو كاملين ... اي حاجة حصلتي فيها سير كتبها في اليوتيوب راه غادي تلقاها مشروحة ...

◾️مفهوم الدروب شيبينغ :

- اشنو هو الدروب شيبينغ : هو أسيدي ضبر على منتجات لي مطلوبة في مواقع عالمية فحال علي اكسبريس او أمازون ... وتمشي نتا دير ليها كوبي كولي وتحطها في مواقع اخرى فحال إيباي او شوبيفاي وتزيد ليها في الثمن وملي يشري من عندك شي واحد كتاخد ديك المعلومات لي شرا بيها من عندك وتمشي نتا تشري دك المنتج من الموقع لي هزيتيه منو وتصيفطو للعنوان ديال الشخص لي شراه من عندك، وفارق الثمن لي زدتي هو الرباح ديالك نتا ...

باش تفهم أكثر أنعطيك هاد المثال : نتا بغيتي تيلفون قلتيلي النوع اللي بغيتي ... مشيت أنا شريتو بـ 1000 درهم وجيت بعتو ليك بـ 1200 درهم ...

( على شكل وسيط )

ادي تمشي لمواقع الإلكترونية التجارية بحال علي إكسبريس أو أمازون أو غيرهم ... و غاتشوف منتوجات كيتمشاو أو غيرها  او غاتعاود فيهم البيع بثمن زايد يعني غاتزيد هامش الربح ونتا غاتولي بحال وسيط منين تيطلب شي واحد داك المنتوج تتشريه وتتزيد عليه الثمن او هامش الربح ديالك ويمكن ليك دير موقع خاص بك وإسم خاص بك باش تزيد الثقة ديال الزبون ديالك ويمكن ليك تبيع لكل الجنسيات في العالم ويمكن ليك تشهر المنتوجات لي بغيتي تبيع في فيسبوك أدس أو إنستغرام أدس وغيرها ...

غير هو فالافتراضي غادي تمشي تشوف شي واحد عندو Stock ( مخزن لشي منتوج نتا كتشوفو غيتمشى ) وغادي تهضر معاه وتقول ليه أنا غانخدم Drop Shipping وغاتشري منو المنتوج مثلا بـ 10 دولار وتمشي تبيعو نتا بـ 15 ( باش تبيعو غادي تعملو فـ Ebay ولا الى كنتي محترف وباغي تزيد القدام غادي تدير موقع ديالك مع Shopify وتعمل اعلان بـ Facebook Ads ).

الدروب شيبينغ شويا فيه بزاف ما يتقال وخاصك تقرا عليه بزاف باش دخل ليه، خصوصا ان الاغلبية كيخدموا في إيباي ودبا كين مشكل ديال اغلاق الحسابات، وشوبيفاي كين لي ما باغيش يخلص المصاريف وكين لي كيفضل يدير متجر ووكوميرس ...
الدروب شيبينغ غادي تحتاج فيه تقريباً نفس الأمور لي هضرت عليها الفوق الى جانب حساب باي بال، وطبعا هادشي فيه دورات في اليوتيوب.